بضم صدرك

إفتح شبابيكـ الهوى جيتكـ اليوم

بإحساس من زود الوله عده يطير

جيتكـ مثل طفلن له أيام محروم

عن حضن أمه أبعدته المقادير

وجيتكـ مثل عودن له أيام مهموم

وده يلاقي بأخر الوقت تقديــر

وجيتكـ حضن عاشق وهايم ومغروم

وده يضمكـ لين تصبح على خير

متى تحس إن الهوى شي مقسوم

من قسمة الخالق على خلقه يصير

ومتى تحس إني لكـ أطيح وأقوم

وأتعب على شانك وأقدرك وآغير

لي في هواكـ أحلام وأمال وعلوم

وأحزاب وأصحاب وقصيد وجماهير

وهموم وأفكار وهواجيس وحلوم

ودروب وأخطار وعذاب ومشاوير

وحب وغلا وإخلاص ومعاند ولوم

وإحساس وإلهام وشعور وتفاكير

وصحبة سهر ومقاطعة لذة النوم

وأشواق جياشه وعشق وتعابير

في ذمتكـ مابان لكـ شي مكتوم

من بعد ماصورت الأوضاع تصوير

لاتحسب إنكـ شي عابر ومعدوم

وتاريخ حبكـ فاق كل الأساطير

كني لقيتكـ بأغنيه لأم كلثوم

وكني قريتكـ في رواية شكسبير

في كل شي أتخيلكـ وأسمعكـ دوم

وأتأملكـ في الوقت الأول والآخير

من ماضي الأيام لايومكـ اليوم

وغلاكـ عندي ماحصل فيه تغيير

وأنا لكـ الله ماأقبل البيع والسوم

ولا أرضى علي ولاعليكـ المخاسير

لاْني الوحيد إللي على بحركـ يعوم

وإللي عرف مرساه في رحلة السير

لحظة حبيبي قبل يسبقني النوم

بضم صدركـ لين تصبح على خير